دونوں اپنے آپ میں تشنہ، دونوں خاک اُڑانے میں
فرق ہی کتنا رہ جاتا ہے دشت میں اور دیوانے میں
میری خاموشی ہی شاید میرے بیان سے بہتر تھی
میں نے اپنا آپ گنوایا اپنا آپ بتانے میں
یہ جو مجھ میں اور طرح کا شخص دکھائی دیتا ہے
دیکھو ! میری عمر لگی ہے یہ تصویر بنانے میں
اور پھر اک دن کوئی اچانک اس کو آگ لگاتا ہے
کتنی مدت لگ جاتی ہے دل کا شہر بسانے میں
خیر پھر اک دن کچھ آنسو ہی دشتِ بلا میں آٹپکے
ورنہ کوئی حال نہیں تھا سینے کے ویرانے میں
سعود عثمانی
