چلا گیا۔۔۔۔۔۔۔

سُنے کون قِصّۂ دردِ دِل میرا غمگُسار چلا گیا
جسے آشناؤں کا پاس تھا، وُہ وفاشعار چلا گیا

وُہ سخن شناس، وُہ دُور بِیں، وہ گدا نواز وُہ مَہ جِبیں
وہ حسیں، وُہ بحرِ عُلومِ دیں، مِرا تاجدار چلا گیا

جسے نُور مہرِ علی ؒکہیں وُہ کہ جس کا نام ہے مُحی الدین ؒ
مجھے کیا خبر، کہاں لُوٹ کر، وُہ میری بہار، چلا گیا

وُہی بزم ہے، وُہی دُھوم ہے، وُہی عاشقوں کا ہجوم ہے
ہے کمی تو بس اُسی چاند کی، جو تہہِ مزار چلا گیا

کہاں اَب سخن میں وُہ گرمیاں کہ نہیں رہا کوئی قدرداں
کہاں اَب وہ شوق کی مَستیاں کہ وُہ پُر وَقار چلا گیا

میں جِسے سُناتا تھا دردِ دل ، وُہ جو پُوچھتا تھا غمِ دُروں
وُہ گدا نواز چلا گیا ، وہ وفا شِعار چلا گیا

بہیں کیوں نصیر نہ اشکِ غم ، کرُوں کیوں نہ نالہ و زاریاں
مجھے بےقرار وُہ چھوڑ کر، سرِ رھگزر چلا گیا ہ

Leave a Reply

Your email address will not be published. Required fields are marked *

Back To Top