سب قرینے اسی دل دار کے رکھ دیتے ھیں
ھم غزل میں بھی ھنر یار کے رکھ دیتے ھیں
شاید آ جائیں کبھی چشم خریدار میں ھم
جان و دل بیچ میں بازار کے رکھ دیتے ھیں
تاکہ طعنہ نہ ملے ھم کو تنک ظرفی کا
ھم قدح سامنے اغیار کے رکھ دیتے ھیں
اب کسے رنج اسیری کہ قفس میں صیاد
سارے منظر گل و گلزار کے رکھ دیتے ھیں
ذکر جاناں میں یہ دنیا کو کہاں لے آئے
لوگ کیوں مسئلے بے کار کے رکھ دیتے ھیں
وقت وہ رنگ دکھاتا ھے کہ اھل دل بھی
طاق نسیاں پہ سخن یار کے رکھ دیتے ھیں
زندگی تیری امانت ھے مگر کیا کیجیٸے
لوگ یہ بوجھ بھی تھک ھار کے رکھ دیتے ھیں
ھم تو چاھت میں بھی غالبؔ کے مقلد ھیں فرازؔ
جس پہ مرتے ھیں اُسے مار کے رکھ دیتے ھیں !!
احمد فراز
