روداد محبت کیا کہیئے کچھ یاد رہی کچھ بھول گۓ
دو دن کی محبت کیا کہیئے کچھ یاد رہی کچھ بھول گۓ
جب جام دیا تھا ساقی نے جب دور چلا تھا محفل میں
ایک ہوش کی ساعت کیا کہیئے کچھ یاد رہی کچھ بھول گۓ
اب وقت کے نازک ہونٹوں پرمجروح ترنم رقصاں ہے
بیداد مشیت کیا کہیئے کچھ یاد رہی کچھ بھول گۓ
احساس کے مے خانے میں کہاں اب فکر و نظر کی قندیلیں
آرام کی شدت کیا کہیئے کچھ یاد رہی کچھ بھول گۓ
کچھ حال کے اندھے ساتھی تھے کچھ ماضی کے عیار سجن
احباب کی چاہت کیا کہیئے کچھ یاد رہی کچھ بھول گۓ
کانٹوں سے بھرا ہے دامن دل شبنم سے سلگتی ہیں پلکیں
پھولوں کی سخاوت کیا کہیئے کچھ یاد رہی کچھ بھول گۓ
اب اپنی حقیقت بھی ساغربے ربط کہانی لگتی ہے
دنیا کی حقیقت کیا کہیئے کچھ یاد رہی کچھ بھول گۓ
