جِند گالی ، بَن سوالی رہندا اے مَن خالی خالی
زرد ہَوئی مُکھ دی لالی ، عِشق دی پر لَج پالی
پر ٹَلی نہ رات کالی ، جان ہِجراں وِچ اُبالی
پریت وَکھری تے نِرالی ، جاندی نہ پر سَبھ تَوں پالی
وعدے تیرے ، تیرے وانگوں ہَو کے اِک اِک بُھر گۓ
تِیر ہِجراں والے تیرے ، کُھبھ میرے اندر گۓ
چار دن دی ہے حیاتی ، باقی دو دن رہ گۓ
تُوں کِیہ جانیں تیرے باہجوں ، ہاسے ناں دے رہ گۓ
پَوٹیاں تے گِن کے سارے ، درد ہاں ہُن بَہہ گۓ
دل دے موسم اُجڑے سَبھ ، سُک گئی اے ڈالی ڈالی
جِند گالی ، بَن سوالی ، رَہندا اے مَن خالی خالی
