ذرا دیکھ کے چال ستاروں کی ،،،
کوئ زائچہ کھینچ قلندر سا ،،،
کوئ ایسا جنتر منتر پڑھ ،،،
جو کر دے بخت سکندر سا ،،،
کوئ ایسا چلہ کاٹ کہ پھر ،،،
کوئ اِسکی کاٹ نہ کر پاےٴ ،،،
کوئ ایسا دے تعویذ مجھے ،،،
وہ مجھ پر عاشق ہو جاےٴ ،،،
کوئ راہ نکال، کرشمہ گَر ،،،
مری راہ میں پھول، گلاب آئیں ،،،
کوئ پانی پھونک کے دے ایسا ،،،
وہ پئیے تو میرے خواب آئیں ،،،
کوئ ایسا کالا جادُو کر ،،،
جو جگ مگ کر دے میرے دن ،،،
وہ کہے کہ پِیا جلدی آ ،،،
اب جیا نہ جاےٴ تیرے بن ،،،
کسی ایسی راہ پہ ڈال مجھے ،،،
جس راہ سے وہ دلدار ملے ،،،
کوئ تسبیح، دم، درُود بتا ،،،
جِسے پڑھوں تو میرا یار ملے ،،،
کوئ قابُو کر بے قابُو جِن ،،،
کوئ سانپ نکال پٹاری سے ،،،
کوئ دھاگہ کھینچ پراندے کا ،،،
کوئ منکا اِکشا دھاری سے ،،،
کوئ ایسا بول سکھا دے ناں ،،،
وہ سمجھے خوش گفتار ہوں میں ،،،
کوئ ایسا عمل کرا مجھ سے ،،،
وہ جانے جاں نثار ہوں میں ،،،
کوئ ڈھونڈ کے وہ کستوری لا ،،،
اُسے لگے میں چاند کے جیسا ہوں ،،،
جو مرضی میرے یار کی ہے ،،،
اُسے لگے میں بالکل ویسا ہوں ،،،
کوئ ایسا جادُو ٹونا کر ،،،
مرے عشق میں وہ دیوانہ ہو ،،،
یوں اُلٹ پلٹ کر گردش کی ،،،
میں شمع، وہ پروانہ ہو ،،،
کوئ ایسا اِسمِ اعظم پڑھ ،،،
جو اشک بہا دے سجدوں میں ،،،
اور جیسے تیرا دعوی ہے ،،،
محبوب ہو میرے قدموں میں ،،،
پر عامل رُک، اِک بات کہوں ،،،
یہ قدموں والی بات ہے کیا ،،،
محبوب تو ہے سَر آنکھوں پر ،،،
مجھ پتھر کی اوقات ہے کیا ،،،
اور عامل سُن، یہ کام بدل ،،،
یہ کام بہت نقصان کا ہے ،،،
سب دھاگے اُسکے ہاتھ میں ہیں ،،،
جو مالک کُل جہاں کا ہے
