چلو چھوڑو۔۔۔۔

چلو چھوڑو۔۔۔
محبت جھوٹ ھے,
عہدِ وفا اِک شغَل ھے بے کار لوگوں کا۔۔۔

چلو چھوڑو۔۔۔۔
مجھے احساس ھی کب تھا
کہ تُم بھی موسموں کے ساتھ اپنے پیرھن کے
رنگ بدلوگے۔۔۔

چلو چھوڑو۔۔۔
وہ سارے خواب کچّی بھُر بھُری مٹی کے
بے قیمت گھروندے تھے

چلو چھوڑو۔۔۔
میرا ھونا نہ ھونا اِک برابر ھے۔۔۔
تم اپنے خال و خد کو آئینے میں پھر نکھرنے دو
تم اپنی آنکھ کی بستی میں پھر سے اِک نیا موسم اُترنے دو۔۔
’’ میرے خوابوں کو مرنے دو ‘‘
نئی تصویر دیکھو
پھر نیا مکتوب لکھّو
پھر نئے موسم نئے لفظوں سے اپنا سلسلہ جوڑو
میرے ماضی کی چاھت رائیگاں سمجھو
میری یادوں سے کچّے رابطے توڑو
چلو چھوڑو۔۔۔
محبت جھوٹ ھے۔۔
عہدِ وفا اِک شَغل ھے بے کار لوگوں کا۔۔۔۔

سید مُحسن نقوی